بكره الزمان هايكدرك .. ضياء الدين البري

السلام عليكم .. مجرد رأي
كلام من قلبي



...

http://elgendy.forumotion.com/montada-f3/topic-t12433.htm


بكــره الزمــان هايكـدّرك

.........

مش هاكتبـك

في سطور بتنطق أي معني ينصفـك

ولا هارسمـك

في عيون بتحكي أي لحظه فْ دنيتـك

ولا هاوصفـك

في غناوي ينطق لحنها من مهجتـك

لكن ضروري أفكـّرك

أيام هواك ماكان بيخطف نبضتي

ينده يلاقي دق قلبي وهمستي

الروح تسيبني وتيجي تسبق نبضتـك

تجري تسلم نفسها وفْ قبضـتك

وكنت عارف لهفتي ومحبتي

لما باشوفك تيجي مرّه ناحيتي

يحصللي إيه لما عنيّا بتلمحـك..؟

إحساسي إيه لما إيديّ بتلمسـك ..؟

كانت حياتي بتبتدي من نظرتك ..

لما عنيّا كات تشوف سحر فْ عنيـك

أنسي حياتي كلها وانده عليـك

وأهاتي دايما تختفي بلمسة إيديـك

وبعد اللي شوفته فْ غربتـك ..

دلوقتي باطلب همّـتـك..

بلاش تجيني همستـك ..

إوعاك تقول إني هالبـّي رغبتـك

ولا قلبي يوم يرجع ويسمع ندهتـك

هايجيني يوم وانسي فْ عنيك لحظة شروق

يمكن عنيّـا يجيها يوم تقدر تفـوق

نجمي فْ سماه يرجع يبات تاني فْ هدوء

هاقول ياقلبي انسي الموده فْ دقتـك

وعيش في ليلك وافتكر ، معاني تشفي علّـتك

يمكن تلاقي فْ سكتك ، نسمه ترجّع فرحتـك

وانسي اللي كان هايوصلك بحر الغرق

شطوطه نار ترسمها نور وبدون ورق

حتي الخطوط شايلها ليل نجمه اتشنـق

أنا كنت روح دايما بترسم جنتـك

جوّايا قلب مالوهش ذنب فْ قسوتـك

بكره الزمان هايكدّرك

حتي المكان هايفكـّرك

بكره تقول ولا شبه يوم في محبتـك

لكن هاقول بكره الأصول هاتعلـّمك

فات الأوان ، ونسيت معالم حضرتك



............




أشكركم
وللجميع تحياتي