admin
Admin
عدد المساهمات : 2444
تاريخ التسجيل : 12/06/2009
 |  موضوع: رد: ولســّـه عايزه تفهمي ..؟ ..........أحمد مصطفي البري  السبت فبراير 19, 2011 5:59 pm | |
| | |
|
admin
Admin
عدد المساهمات : 2444
تاريخ التسجيل : 12/06/2009
| | موضوع: رد: ولســّـه عايزه تفهمي ..؟ ..........أحمد مصطفي البري السبت فبراير 19, 2011 5:48 pm | |
| | |
|
admin
Admin
عدد المساهمات : 2444
تاريخ التسجيل : 12/06/2009
| | موضوع: ولســّـه عايزه تفهمي ..؟ ..........أحمد مصطفي البري السبت فبراير 19, 2011 5:48 pm | |
|
ولسـّه عايزه تفهمي ..؟
.......
( 1 )
الحلم ضاع ..؟
واللا انتي لسه بتحلمي ..؟
غيط السنابل
لو يرتوي ، يطرح أمل
يمحي ظلام بدر اكتمل
ويْـعود صبي..
ضل وْدليله كان غبي ..
مطرود وحلمه ضاع وجاع
مستني يرجع يوم شجاع
إتجملي..
ملامحه ترجع تترسم ..
جراحه يمكن تلتئـم..
عيونه تصحي وتبتسم..
وعشان تعيشي وتـسلمي
إتحملي..
وحاولي مرّه تحلمي
( 2 )
ولسّـه عايزه تفهمي ..؟
طب حاولي يمكن تقدري
طوفي الحارات ، وفْ كل حي
علي نبض إبنك دوّري
إتأملي ..
جايز تلاقي شبْـه ضي
أو حلم في الزمن اللي جي
إتمهلي ..
بصي فْ عنيه
تلقي الهمم ، ملهاشي زي
حسّي بْألامه وارحميه
شايفه السنين ، دايره تعاديه..!
سيباها برضه وتهملي ..؟
( 3 )
ولسه عايزه تفهمي..؟
إبنك ملاه الخوف ظنون
روحي اندهيه
يمكن يكون
ع الشط مالـْحقش الغرق
مسجون في حلمه الْ اتخنق
بيجدده ، مجد الصحابه
عاشوا فداكي وطبعهم
أصل وطيابه
ويردّده ، عشق الغلابه
ومّا ولادك دول شافوه
من غير سؤال
يشغل له بال
عرفوا بإنه منـُّهم
مدّوا إديهم كلُّهم
رقصت عيونهم
نبضت قلوبهم
من هلـّته ، فرحوا ونادوه
قدْروا علي جرْحو وْداووه
فتّح عنيه ، لمح الأمل
جوّا قلوبهم سكّنوه
وهُمّ دول أهل العلل ..
من بؤس حاله قدّروه
وطبـّبوه
أميرعليهم نصّبوه
يمكن يعيد أمجاد أبوه
اللي اتشنق ..
متاهشي لمّا عذبوه
كتر العذاب ، نشّـف دماه
ومخافشي لمّا خوفوه
ولمّا حاولوا يلبّـسوه
توب الجنون
قلبه نده ، كله يهون
ربك ستر ، جلّ فْ علاه
ومغابشي لحظه فْ يوم وتاه
مهما الغراب طل وزعق
الموت علي جبينه نطق
ومسابشي طينك يتحرق
عشان تعيشي بقلب حي
رغم الحياه
قاسيه وصعبه ع البطل
عايشينها برضه بدون كلل
النخوه موجه فْ بحرهم
سر المحبه فْ صبرهم
وحبّك انتي يلمّهم
رغم النهار ، مليان كآبه
والظلم عشّـش وسطهم
دبّاح وهاضر دمهم
وطموح بتسقيهم ملل
والليل ناسيه بدر وقمر
دايما يفوت ..
ساكنه السكوت..
حزين وصابه كتير خلل
والجوع بيضرب ع الدفوف
لحن الوفا
ومجاش في يوم ، حن وعفا
حر العطش ، بيزيد دفا
والفقر لاوي الكلمه ليْ
مرسوم علي جبينهم تابوت
وشبه صوره ع الجدار
شكل الكلام ، باين خطوط
ودموع تلالي وتبتسم
نجوم بتهرب جوّا ليل
والمر طاوي الدنيا طي
مسعور وناوي يلمّـهم
لكن صمود الصبر حيْ
يكوي فْ قلوب الشر كيْ
اللي بتاجروا في الضياع..
واللي نسيكي فْ يوم وباع..
واللي ملك أرضك مشاع ..
واللي غلب طبع الشيطان..
واللي جلب حِلـْف الحيتان..
جوّا المحيط ، زارعين ديدان
تطرح عقارب سُمّهم
جوّا الميدان
بيقطـّعوا فْ صلب الكيان
وكتير ضحايا لحلمهم
عايشين حياه ذل هوان
ويقولوا عنـهم دول رعاع
مالهمش حق الإنتفاع
ويزيدوا يامّه فْ ظلمهم
وكل دا إكمنهم ..
عاشقين سماكي وكل طير
ماشيين جواعه ومحرومين
ومسجونين والقيد حقير
جوّا حدودك مطرودين
كتر المحن ، بيزيد صلابه
واللي اشتراكي فْ يوم ماباع
حلمك يجدد نبضهم
بكره الأمل ، يمحي السحابه
والنبض يرجع حيّـهم
وتعيشي تاني بقلب حي
جوّا القلوب ، ماليكي زي
وبرضه رافضه تحلمي ..؟
( 4 )
ولسّـه عايزه تفهمي ..؟
طب دوَّري
لو تقدري
يمكن تشوفي الطير طشاش
ماشي وتاهت سكّـته
ضاعت ملامح عشته
خايف في لحظه يتجرف
تطارده موجَهْ وينحرف
يموت غريق
وتّـوه معالم جثــّـته
بريء وهانت دمعته
وليه نسيتي محبته .؟
كان نفسه يحلم يوم يطير
في الجو لحنه يتعزف
ويعيش يومين حر وطليق
في الحلم طار ، مرّه ومجاش
تاه السنين ، جوّاه أسير
ريشه اتنتف
عملوه بخور
حتي اللسان ، من سكتته
عمّال يفور
جوّا القفص ، بطـّل زعيق
حلمه اتخطف
وصاحبه ليل ، فجره شحيح
بيزيد أنين قلبه الجريح
يصبر ونادي لهفته
يمكن في بكره
يلمح شعاع
أو شبه نور ، يعلن نهار
يمكن يكون جوّاه حنين
يلحق أمل ساكنه الضياع
وكفايه إنه من سنين
مسجون في غار
الصحبه فيه المطحونين
بيصبره نبضه الحزين
من بعد مانسيتي الطريق
وقْـبلتي نفضل مجروحين
ذنب الضحيه كان فقير
وحلمه خوف ، بكراه كسير
من كل دا هرب الضمير
وبرضه خايفه تحلمي ..؟
( 5 )
ولسّـه عايزه تفهمي ..؟
طب دوّري
لو تقدري
قومي إندهي ، قولي يارب
يسمع نداكي كل قلب
حَـبِّـك وحُـبّك كان له ذنب
يدعي لربه في الصلاه
يرحمنا ويفرّج هموم
ملناشي في الدنيا سواه
وعشان تحاولي تغيري
إنسي الحكاوي
شوفي التاريخ ، م الظلم تاه
قومي انهضي ، كفايه نوم
جامليني مرّه وقولي آه
إنوي في لحظه وقرري
مدّي إديكي وابدري
حبة تقاوي
يمكن تجيها الروح في يوم
تنده علي نبضك يقوم
تخـْضر أغصان الحياه
ونْـشوف سماكي بدون غيوم
تطرح غناوي
من بين حروفها يتولد قارب نجاه
يقدر يجدف بالأمل وكتير وراه
ينده نهار ، جوّا الظلام
الخوف رماه
ساعاته ريح ، وليله صعب
كفايه نار ، وكتير ملام
الظلم عار ، وشْـبعنا غلب
اتشجعي وقولي يارب
حبة طموح ، تنده أمل ، ضل وتاه
إنتي اللي ربي كرّمك من فوق سماه
زارك صحابي وأنبيا ونلتي رضاه
إمتي تفوقي وتندهي ، إبنك بحب
يرجع لحضنك يحتمي ، من كل صعب
ومّا نشوفك تحلمي
إبنك هايلمح خطوته ، تحلم معاه
ساعتها والله هاتفهمي
إن الأمل ، نبته الضعيف ، يحيي الهمم
ياخد بحق المظلومين م اللي ظلم
ترجع مكانتك شأنها فوق القمم
ابنك هايحمي نبضتك
الكل عاشق نسمتك
مستني يلمح بسمتك
قلبك كبير ، بالخيرعمار
ومْحبتك في كل قلب
ولْ دنيتك قبله ومنار
ونْـعيش حياتنا بعزتك
وهاتسلمي
وأكيد ساعتها هاتفهمي
....
اشكركم
وللجميع تحياتي
| |
|
