من غير دليل .. ضياء الدين البري

Admin عدد المساهمات : 2444 تاريخ التسجيل : 12/06/2009

السلام عليكم .. كلام من قلبي
أحمد مصطفي البري كتب :
من غير دليل

.....

هوّا انت مين .؟
وفْ نيتك توصل لفين.؟
عشان تجيب سيرة الحمير
هوّا انت عشت فْ وسطهم.؟
حاولت تقــْرب منّـهم.؟
فـهمت شيء من طبعهم.؟
عشان تزيد وتعيد كتير
كتير يحبّوا نفسهم
ونسيوا شيء اسمه الضمير
إوعاك تفكر زيّهم ..
خلـّيك ملاك في توب فقير
ولأنّك انت عكْسهم
إوْعاك تلومني ..
عايزك كمان تقـْبلها منّي
لأني عارف إنّـهم
شطبوا الأصول من عرفهم
النبض برّاهم طفش
هدّوا الزرايب والطوايل والعشش
دول سهدموا كل الحيطان
زرعوا النجيل جوّا الغيطان
نهبوا المحالج ، والمغازل
ودمّروا البنيان
قلعوا البرادع ، والحوافر
فكّوا اللجام ..
نسيوا السّـقِـيـّه م الترع
خاصموا النهار
واتعلموا فنون السّهر
فجأه لقيتهم أدْمنوا
نفخ السّيجار..
عشان دا نوعه مفتخر
مايهمّش اللون والتّمن
ودول كمان صاحبوا الزمن
ساعدوه علي جلب المحن
زرعوا الفتن ..!
طرحت أهات في قلوب بشر
تقاوي طارحه كتير عطب
هرسوا المعسّل في العجير
طحنوا الهباب جوّا الشعير
رموا الشقارف جوّا بير
بعد النجيله والدنيبه والحطب
فجأه لاقيتهم بدّلوا
أكل النـُّخاله بالفطير
من بعد خيش
يدّاروا فيه ، وقت اللزوم
عرفوا مزاج شـُرْب الحشيش
والبردعه متفصله من خيط حرير
عايشين حياتهم أبـّهه
سُـكـْر وحداقه وزهزهه
يتقمعوا
ع الشط زاطوا ولعلعوا
والمرمغه فوق الرمال
نسيوا وتدهم ع الحيار
نسيوا الدّواره ع الـمدار
شد النوارج ع الغلال
في الكارّو سايـْقينـْهم عيال
كرباج ورا
ويْأدبوهم بالشِّـعَبْ
نسيوا المحشـّه والبـُلط
ناف السواقي والغما
ملـْـس القنايه والشادوف
داسوا العمامه
والكمامه
وفلانكة الطنبور
دول غيّروا لحن النهيق
واتعلموا فن الخُـطب
دفنوا الدريس جوّا القبور
داسوا الكواكب في السما
قلعوا خلاص سرج وغما
حرقوا الذراويه والغلال
والمدْره والمحرات
نسيوا المناجل والرّوال
فوس الشراقي والشقارف والوتد
نسيوا كمان وقت الحصاد
قلعوا خلاص زعب الغبيط
دول نسيوا حتي إسم غيط
يبقي انت ليه.؟
من غير دليل
بتقول كلام .؟
يشغل قلوب ، والشك فيه
ياعم داحنا اشبعنا لوم
عايز نهارنا يبقي ليل.؟
والليل وراه تيجي الغيوم.؟
عصافير وننسي الزقزقه.؟
وخيل يبطل دقدقه.؟
ماكفايه حقد ع الحمير
أصل الحياه ، مش ناقصه زوم
الفقر طافش م الهموم
ودا حلف ماعرفش الغيوم
طول عمره عايش خندقه
مملكته حلوه محندقه
عاشوا الحياه مترستقه
صاحبوا الديابه والتعالب والقرود
حتي الجوارح والزواحف والفهود
أدوار كتير متنظمه
ناويين في يوم يبنوا السدود
ويرسموا تاني الحدود
بـس الأسود
جوّا الحديد ، متلجمه
عاليه الهدير والهمهمه
وكتير صحاب من كل لون
وقت النّدا الروح تهون
أصل الحياه متقسّمه
وبأمر رب العالمين
كله يهون
....

» وليـــــــــه الحب من تاني... أحمد مصطفي البري ( ضياء الدين البري )
» ورجّـع قلبي ياشاطر .. احمد مصطفي البري ( ضياء الدين البري )
» عناوين تايهه ... أحمد مصطفي البري ( ضياء الدين البري )
» في أواخـــــــــر الســـــطر .....أحمد مصطفي البري (ضياء الدين البري )
» ياااااااااااااااأمتي ....ضياء الدين البري