مرة قابلني شيطان وندهلي
.............
مرة قابلني شيطان وندهلي
إتأخرت شويه ف حيره
دوقت الخوف
اتسمرت شويه مكاني
توهت دقيقه لحد ماشوف
قلبي ساعتها كان مخطوف
ولما سالته
ليه تناديني ..؟
هوَّ انا صاحبك ..؟
رد وقالي
جرب شوف
عايز اصاحبك
وافضل جانبك
يوم تحتاج لي راح تلاقيني
واقدر انفــَّذ كل أوامرك
وافضل اساعدك علشان تكبر
تنهي وتؤمر
تزرع عزوة ف كل ملاعبك
تطرح كل جناينك خوف
ساعتها تقلع كل عداوتك
وهاخطط لك
تبني صفوف
تجمع جوه قلوبها أساوتك
وقت الأزمة هاتبقي تشوف
طـوَّل بالك
شوف تفانيني
ان ملاقيـتش كل سعادتك
إبقي جافيني
وان مبقيتش سر فخامتك
ابقي خاصمني
ابعد عني وابقي عاديني
أصل الكون انا عامله كهوف
عارفه وشايفه كله بعيني
وعندي زباين جايَّة بواسطة
قولت له لحظه
رد سؤالي وافهم مني
عمال تسرح بيَّ وترطن
فكرك تقدر تاكل عقلي
ولحظة الاقي نفسي ف ورطة
أنت أذيه وندل مشيطن
وبعد دا كله مش مكسوف.؟
وممكن تاني اسمع منَّـك
ومتهيألك
تقرب مني ونبقي اصحاب
واخسر نفسي
وتخسرني الآخرة أوانطة
والله دي تبقي اكبر غلطة
أصل الدنيا ماهيش لهياني
عايش راضي بروح عجباني
وباحمد ربي
وباتمنالك تبعد عني
قبل ماتبقي مسخة أهلك
وان ما بعدتش جرب شوف
موضوع: مرة قابلني شيطان وندهلي 
الإثنين أكتوبر 26, 2009 3:06 am
