ياخلق ملّينا السكوت..من أشعاري

Admin عدد المساهمات : 2444 تاريخ التسجيل : 12/06/2009

ياخلق ملّينا السكوت

.....

الدنيا شيفانا كدا
فوتنا المروءة بغددا
متفرقين طول السنين
وفيه قلوب بتزيد عدا

نسْيـِتـْنا كلمة مرحبه
والنيه بايته مذبذبه
سايبين ولادنا حيرانين
قضُوها نوم ع المصطبه

شاطرين نقدم مظلمه
للي داسونا بمفرمه
اللي فاتونا مطحونين
واليوم بقينا مفحمه

نحسب أمورنا بنمرده
وعقولنا تايهه مفرهده
كترت همومنا ومغلوبين
لقمتنا خوف متعربدة

بنتوه حياري ومسكنه
برضه يزيدونا عكننه
دنيا وعاصيه المحرومين
العيشه ماشية عافينه

مالناش إرادة ف شأننا
ساكتين كتيرعلي حقنا
الشله قاسيه ع الجنين
وياريتها راضيه عننا

شايف أمل لسّاه بعيد
جايز يكون مولود جديد
رب العباد هوّ المعين
يرحمنا من ظلم العبيد

بعنا الأصول ويّا الحدود
ضيعنا خير كل الجدود
ونسينا إنا مسجونين
وبقينا دود جوّ السدود

الغوله واقفة بمعلمه
بجاحتها باينه بمعظمه
واحنا ياناس متفرقين
وانسينا والله الملحمة

ياخلق ملّـينا السكوت
عايزين نحرر أو نموت
لإمتي نفضل مهزومين
خلّونا نخرج م التابوت

............

» فين الرحمة ياخلق اللــــــــــــــــــه ..؟؟ ضياء الدين البري
» قصيدتي : وليه ياخلق م الأول.. ضياء الدين البري