هوّا خلاص هان الشرف ..؟ ضياء الدين البري

السلام عليكم .. مجرد رأي
كـلام من قلبي


http://elgendy.forumotion.com/montada-f3/topic-t11222.htm


هوّا خلاص هان الشرف..؟
........


ياااااكل قلب النبض فيه
عايش ونبضه الخير ماليه
ناسيين صراخ الأقصي ليه..؟
ينده عليك يامنصرف
هوّا خلاص هان الشرف..؟
فرّطنا فيه للي معاديه
جوّا القلوب مات العصب..؟
طب ليه نسيبه مُغتـَصب..؟
في الأسْـر شايفه بيتظلم
توب الكفن متقاس عليه
ولإمته نفضل ننضرب..؟
مستسلمين وبدون غضب
جوّانا خوف تـُقـْل الهرم
متفرقين وبدون سبب
وكفايه نبكي ونواسيه
جوّانا صمت بنعانيه
وبقينا فرجـه للأمم
متوسلين حتي الهرب
بعنا الضمير خـِرْبت ذمم
سبنا التاريخ جوّا الكتب
شاطرين نكبّـر في العمم
منا اللي باع واللي نهب
واللي عدانا وانحرف
ياكُـلْ حُـرْ الدور عليك
قلبك سجين والخوف ماليه
فك الحصار حرر قلم
هات الحروف حرك إيديك
الكلمه حرّه بتناديك
نـوّر قلوب أهل الحـِكـَم
إنده بصوت تقـوي الهمم
بيّـن عيوبنا واعترف
دا قايل الحق الله حاميه
والكل شايله بين عنيه
تلقي القلوب فرحانه بيك
تكتب تلوّن في الحروف
مرسوم بريشتك يتوصف
يطرح أمل الله عليه
ينزع من الانسان دا خوف
وتشوف رجال والله عجب
نسمع أدان الفجر فيك
تصحي همم نامت عدم
تقوم تدوّر يوم عليك
تبكي اللي راح تبدي الندم
حتي اللي مال يرجع يقف
نبني تاريخ كان اتهدم
تحيي انتماء كان اتخطف
نبض القلوب يرجع يطوف
ينده ياشوق اللي اتحرم
من نبضي وفْ حبه اتظلم
مادد اديّا الدورعليك
طول عمري قلبي مانـْحرف
ياللا تعالي نكون قمم
علّي الكيان رمز وعلم
الأقصي من أسره يناديك
والقدس عايش مغتصب
رب العباد دايما حاميه
لازم نقر ونعترف
إن احنا ناس قصرنا فيه
راجعين بعون الله إليه
ودا رغم أنف المغتصِـب



.........

أشكركم
وللجميع تحياتي